Binati ng isang opisyal mula sa Catholic Bishops’ Conference of the Philippines (CBCP) ang pagkakapasa ng Community Service Act sa Senado.
Ipinasa sa ikatlo at huling pagbasa ng Senado ang Community Service Act na layong magpataw ng community service sa halip na makulong dahil sa minor offense.
Sa inilabas na pahayag, sinabi ni Rodolfo Diamante, Executive Secretary ng CBCP-Episcopal Commission on Prison Pastoral Care, na ipinagdarasal nito ang pagsunod dito ng Mababang Kapulungan ng Kongreso at ni Pangulong Rodrigo Duterte.
Ayon pa kay Diamante, matagal na itong adbokasiya ng Simbahang Katolika para sa pagbibigay ng hustisya.
Sa ilalim ng Senate Bill 2195, maaaring isilbi ang community service sa mga pagkakasalang mapapatawan ng arresto menor o pagkakakulong nang hanggang 30 araw at arresto mayor o pagkakakulong ng anim na buwan.
Oras na makumpleto ang community service, maaaring ipag-utos ng korte ang pagkakalaya ng suspek sakaling hindi na kailanganin ang pagkulong sa ibang krimen. / Angellic Jordan