Inatasan na ni pangulong Rodrigo Duterte ang mga kinauukulang ahensya ng gobyerno na ibalik sa Australia ang pitong container van ng basura na nakaimbak sa Misamis Oriental.
Ayon kay Presidential Spokesman Salvador Panelo, malinaw ang paninindigan ng pangulo na hindi basurahan ang Pilipinas.
Nakaiinsulto aniya ang ginawa ng Australia dahil tahasang pambabastos ito sa ating sobereniya.
Nakapagtataka ayon kay Panelo kung bakit napapapasok pa sa bansa ang mga basura gayung mahigpit ang pagbabawal dito ng pamahalaan.
Sinabi rin ng kalihim na posibleng misdeclared cargo ang kontrabando kung kaya nakapasok sa bansa.
Pagtitiyak ni Panelo, mananagot sa batas ang sinumang indibidwal na nasa likod ng pagpasok ng basura sa Australia.
“That will be our stance. It will be offensive to this government to be a recipient of trash or basura. We are offended by that. We will not allow it. We’ll send them back”, ayon pa sa opisyal.
Una rito, nagalit at nainsulto si Pangulong Duterte sa pagtanggi ng Canada na kunin ang tone-toneladang basura na itinapon din sa bansa noong 2013 at 2014.
Nagpapahanap na ang pangulo ng pribadong kumpanya na magdadala ng basura pabalik ng Canada.
Aakuin na rin aniya ng pamahalaan ng Pilipinas ang gastusin sa pagbabalik ng basura.