Tiniyak ng Philippine National Police (PNP) sa publiko na wala silang dapat ipagalala at ikatakot ngayong kasagsagan ng holiday season.
Ayon kasi kay PNP Director General Ricardo Marquez Jr., wala pa namang napapatunayang banta sa seguridad o ng terorismo ngayong panahon ng Kapaskuhan.
Gayunpaman, nilinaw ni Marquez na kahit wala pang nauulat na credible threat, nananatiling nasa heightened alert ang pambansang pulisya.
Paliwanag niya, ang heightened alert ng PNP ay para sa dagsa ng maraming tao ngayon at hindi sa anumang banta ng seguridad.
Pagtitiyak pa ni Marquez sa publiko, sige lang at umarangkada sa pamimili dahil wala naman silang dapat ipag-alala kundi ang dami ng taong susuungin nila sa bawat lugar na madalas pinupuntahan ng mga tao.