San Andres, Quezon itinuring nang election hotspot

Dalawang araw bago ang halalan, itinuring na ang bayan ng San Andres sa Quezon bilang election hotspot.

Ayon kay Col. Ramil Montilla, hepe ng Quezon police, mula sa ‘green category,’ itinaas na ang San Andres sa ‘yellow category.’

Ito ay kasunod ng naitalang dalawang kaso ng pagpatay na may kinalaman umano sa nalalapit na May 13 midterm elections.

Ang mga lugar na kabilang sa ‘yellow category’ ay nangangahulugang mayroong naganap na insidenteng may kinalaman noong nakaraang dalawang eleksyon, may matinding political rivalry at dating isinailalim sa Commission on Elections (Comelec) control.

Ani Montilla, nag-deploy na ang kanilang hanay ng dagdag-pwersa at isang senior official para matiyak ang kaayusan sa lugar.