Alas-8:00 ng umaga sa India nang tumama ang bagyo sa eastern coast taglay ang lakas ng hanging aabot sa 205 kilometro kada oras.
Naramdaman din ang lakas ng bagyo sa iba’t ibang bansa at umabot ang hagupit hanggang Mount Everest.
Ayon sa ulat ng PTI news agency ng India, walo na ang nasawi bunsod ng pananalasa ng bagyo.
Naiulat ang malawakang pagbaha sa ilang mga lugar at ayon sa weather forecasters, posibleng umabot sa 1.5 meters ang storm surge.
Naglaan na ng $140 million para sa emergency relief ayon kay Indian Prime Minister Narendra Modi.
Samantala, isa na rin ang namatay sa Bangladesh matapos mabagsakan ng puno.
Inaasahang kikilos ang bagyo patungong Chittagong sa Bangladesh ngayong Sabado ngunit mas mahina na ito.