Pakete na may lamang high-grade cocaine natagpuan sa karagatan ng Quezon

Kinumpirma ng Philippine National Police (PNP) na high-grade cocaine ang laman ng natagpuang selyadong package sa Burdeos, Quezon noong Sabado de Gloria.

Ayon kay Police Maj. Elizabeth Capistrano, public information officer ng Quezon police, nasa isang kilong cocaine ang laman ng package batay sa resulta ng isinagawang test ng police laboratory.

Nagkakahalaga aniya ang mga kontrabando ng P6.8 Million.

Noong Sabado de Gloria, nakita ng isang Raizel Anog ang package sa baybaying-dagat ng Barangay Cabungalan na halos sakop na ng Pacific Ocean.

Agad dinala ni Anog ang package sa malapit na himpilan ng pulisya.

Ito na ang ikaapat na beses na nakakita ng cocaine sa Quezon ngayong taon.