P100K na halaga ng ari-arian tinangay ng akyat-bahay mula sa isang pamilya sa Maynila

Higit P100,000 halaga ng mga branded bags, shades, cellphone, relo at inipong barya ang natangay ng akyat-bahay mula sa isang pamilya sa Solis Street, Tondo, Maynila.

Nadatnan na lamang ng pamilya Balatbat na magulo at makalat ang kanilang bahay makaraang magbakasyon sa isang resort sa Laguna.

Ayon kay Michelle, may-ari ng bahay, nakita na lamang nilang hindi na naka-lock ang kanilang pintuan.

Pagpasok sa bahay ay kalat-kalat na ang kanilang mga gamit sa sahig, sala at kwarto.

Nakabukas din umano ang kanilang bintana na posibleng dinaanan ng mga magnanakaw.

Nagsasagawa na ng imbestigasyon ang Abad Santos Police station sa insidente.

Nagpaalala naman ang mga ito na i-lock ng mabuti ang kanilang mga bahay kung magbabakasyon at bilinan ang mga pinagkakatiwalaang kapit-bahay.