Sunog sumiklab din sa impounding area sa Maynila, 20 na sasakyan natupok

Hindi bababa sa dalawampung sasakyan ang natupok sa sunog na naganap sa impounding area sa Malate, Maynila.

Ang nasunog na bahagi ng parking area ng Harrison Plaza ay impounding area ng Manila Traffic and Parking Bureau.

Ang mga nasunog na sasakyan ay mga na-tow at sirang sasakyan na matagal nang nakaparada sa bakanteng lote na katabi ng mall sa naturang lugar.

Mayroon ding nasunog na mobile vehicles ng Manila Police District na sira at hindi na nagagamit.

Ayon sa isang parking boy sa lugar, sa sobrang tagal nang nakaparada ang mga sasakyan sa lugar, ang iba dito ay tinutulugan na o ginagawang tambayan.

Inaalam pa ng Manila Fire Bureau kung ano ang pinagmulan ng apoy.