Hepe ng Koronadal City police sinibak; nakuhanan ng video na nakikipag-inuman at nagsusugal kasama ang mga tauhan

Sinibak sa serbisyo ang chief of police ng Koronadal City police matapos kumalat online ang video nito at kaniyang mga tauhan habang nag-iinuman at naglalaro ng baraha sa police station.

Sa pahayag ni Brig. Gen. Eliseo Tam Rasco, director ng Soccsksargen police, ang sinibak ay si Lt. Col. Benjiel Kirby Bajo.

Si Lt. Col. Rey Egos ang pansamantalang papalit kay Bajo sa pwesto, at ililipat muna si Bajo sa headquarters ng South Cotabato police.

Ayon kay Rasco, nagpapatuloy ang imbestigasyon para matukoy kung sinu-sino ang iba pang tauhan ng police station na nakita sa video.

Mahigpit ang bilin ni PNP chief General Oscar Albayalde sa mga pulis na iwasan ang pagpunta sa mga bar, nightclubs, pubs at casino lalo at ayaw na ayaw ito ni Pangulong Duterte.