Magkapatid na Indian nationals patay sa aksidente sa Zamboanga

Nasawi ang dalawang Indian nationals sa aksidente sa lansangan sa highway sa Buenavista village sa Zamboanga City.

Kinilala ni Police Captain Shellamae Chang, spokesperson ng Zamboanga City Police ang mga biktima na sina Amardeep Singh, 33 anyos at nakababatang kapatid nito na si Minindal, 22 anyos.

Ayon kay Chang, binabagtas ng magkapatid ang highway sakay ng motorsiklo nang sumalpok sila sa isang Isuzu truck na minamaneho ni Raymond Dagalea Papas.

Nagtamo ang magkapatid na dayuhan ng matinding pinsala na dahilan ng agaran nilang kamatayan.

Naka-impound na ang dalawang sasakyan na sangkot sa aksidente at nakakulong na ang driver sa Police Station 2.