Magbibigay ng kompensasyon ang Polish Government sa mga mag-asawa sa Poland na magdaragdag ng bilang ng kanilang anak.
Ito ang nakasaad sa inaprubahang bagong family program sa nasabing bansa na layong matugunan ang patuloy na pagbaba ng birth rate.
Sa inaprubahang programa ni Prime Minister Beata Szydlo, bibigyan ng 500 zloyts o katumbas na 124 dollars ang pamilya sa bawat batang ipapanganak kasunod ng panganay.
Ang pinakamahihirap na pamilya ay makatatanggap din ng bonus para sa lahat ng kanilang mga anak.
Dadaan pa sa public debate ang programa bago aprubahan ng parliament. Pero inaasahang sa buwan ng Abril 2016 ay maipatutupad na ito.
Kukunin ang pondo para sa nasabing programa sa mga nakukulekta mula sa mga kaso ng VAT Tax evasion sa bansa at sa buwis na ibinabayad ng mga bagong bangko at supermarkets.
Una nang pinuna ng mga kritiko ang nasabing programa, dahil gagastos daw ang gobyerno ng Poland ng 22 billion zloyts para dito na maaring magresulta ng pagtaas ng budget deficit ng bansa.