Nakumpiskang shabu sa Zamboanga City umabot sa P59 million ang halaga sa nakalipas lang ng 3-buwan

Sa nagdaang tatlong buwan lamang, umabot sa 8.78 kilos ng shabu na nagkakahalaga ng P59 million ang nakumpiska ng mga otoridad sa Zamboanga City.

Ayon kay Sr. Insp. Shellamae Chang, tagapagsalita ng Zamboanga City police office, ang mga nasabat na ilegal na droga ay bunga ng serye ng operasyon na isinagawa ng 11 police stations sa lungsod.

Sa kabuuan, nakapagsagawa ng 214 na buy bust operations ang mga otoridad at nagresulta ito sa pagkakadakip sa 272 drug personalities.

Hindi pa kasama sa nasabing bilang ang isinagawang operasyon noong March 10 hanggang 16 kung saan may nakumpiskang 131 na sachet ng ilegal na droga mula sa 19 na buy bust operations.