Hindi bababa sa 25 ang patay habang 47 ang sugatan matapos ang pagsabog sa isang istasyon ng tren sa Cairo, Egypt.
Ang insidente ay naganap matapos bumangga ang isang humaharurot na tren sa platform ng Ramses station dahilan para sumabog ang fuel tank nito.
Sa isang pulong balitaan, sinabi ni Hala Zayed, Health Minister ng Egypt, inaasahang lolobo pa ang bilang ng patay dahil marami sa mga sugatan ay nasa kritikal na kondisyon.
Nangako rin si President Abdel Fattah el-Sisi na pananagutin ang mga responsable sa aksidente.
Sa video na kumakalat sa social media, makikita kung paano nabalot ng apoy ang katawan ng mga pasahero na tulirong-tuliro dahil sa sakit ng paso na nararamdaman.
Samantala, dahil sa aksidente ay nagbitiw na sa pwesto si Transportation Minister Hisham Arafat.
Ang Ramses district ay ang pinakamataong lugar sa City of Cairo na kabisera ng Egyt.
Ang railway system ng bansa ay sinasabing hindi ‘well-maintained’ at hindi napapamahalaan nang maayos.
Sa mga datos, lumalabas na mula 2017 ay mayroong 1,793 train accidents na naganap sa buong Egypt.