Sa kanyang talumpati sa General Assembly of the League of Municipalities of the Philippines (LMP) Martes ng gabi, binanggit ng Pangulo na nagpulong sila ni Misuari Lunes ng gabi.
“He was not allowed by the court to go out because he has pending charges when he was armed…so I had to make some arrangements. Sabi ko, this is a personal request of me, which I do not do at any time, at any other time. Sabi ko, papasukin — ah palabasin ninyo [I said, let him in — I mean, let him out]” pahayag ng Pangulo.
Pero hindi nilinaw ng Presidente kung kanino at kung saan ang ginawa niyang “arrangements” para sa biyahe ng MNLF leader.
Una nang sinabihan ng Pangulo ang militar at pulisya na hayaan at huwag arestuhin si Misuari.
Nakatakdang dumalo si Misuari sa 46th session ng Organization of Islamic Cooperation (OIC) Council of Foreign Ministers sa United Arab Emirates (UAE) at sa pulong ng Parliamentary Union of the OIC Member States (PUIC) sa Morocco.
Pinagbigyan naman na ng Sandiganbayan ang motion to travel abroad ni Misuari araw ng Martes.
Nahaharap si Misuari sa kasong rebelyon kaugnay ng 2013 Zamboanga siege at nililitis ito ng Sandiganbayan sa 2 counts ng graft at 2 counts ng malversation through falsification of public documents dahil sa umanoy maanomalyang pagbili ng educational materials noong siya ang gobernador ng Autonomous Region in Muslim Mindanao (ARMM).