Nasibak sa pwesto sina Police Chief Inspector Abraham Satorre, pinuno ng District Special Operations Unit (SDOU) ng Eastern Police District (EPD) at si Police Inspector Edward Olmedo, commander ng Pasig Police Community Precinct 9.
Ito ay matapos maaresto ang dalawang pulis mula sa kanilang hanay na sina PO2 Marlou Roldan at PO3 Mark Vista sa ikinasang buy-bust operation noong Biyernes, February 22, 2019.
Sa inilabas na pahayag, sinabi ni NCRPO director Guillermo Eleazar na mahirap maniwalaang hindi alam ng mga police commander ang pag-uugali at aktibidad ng kanilang hanay.
Dagdag pa nito, hindi mag-aatubili ang NCRPO sa paglilinis ng kanilang hanay bilang bahagi ng internal cleansing program ng Philippine National Police (PNP).
Maghahain din aniya ng kasong kriminal at administratibo laban kina Roldan at Vista.
Sa ngayon, patuloy pa rin ang isinasagawang internal investigation sa kaso.