Enrollment sa school year 2019 – 2020 magiging mas maayos – DepEd

Tiwala ang Department of Education (DepEd) na mas magiging madali at maayos ang isasasagawang enrollment para sa pagbubukas muli ng mga klase sa Hunyo dahil sa matagumpay ang isinagawang early registration.

Ayon kay Education Usec. Jesus Mateo layon ng early registration na mapaghandaan ng kagawaran ang pagbubukas ng klase.

Ngayon ang huling araw ng early registration para sa Grades 1, 7 at 11, na nagsimula noon Enero 26.

Unang inihayag ng DepEd na marami ang maagang nagpa-rehistro bunga ng pinaigting nilang information campaign.

Bunga rin ng DepEd Order No. 3 series 2018 ay mas naging maliwanag sa mga magulang at estudyante hinggil sa edad ng bata na maari nang maagang magpa-rehistro.