Lalaki patay sa pananambang sa Cebu City

Patay matapos tambangan ang isang lalaki sa Barangay Pit-os, Cebu City, Lingo ng hapon.

Ayon kay Talamban Police commander C/Insp. Elizandro Quijano, ang biktima ay kinilalang si Joselito Junio, 26 anyos.

Nakasakay sa kaniyang sasakyan ang biktima nang pagbabarilin ng mga suspek na nakaangkas sa dalawang magkahiwalay na motorsiklo.

Bumaba nang sasakyan si Junio para subukang tumakas ngunit dito na siya lalong pinagbabaril ng mga suspek.

Ayon kay Quijano, nasa drug watchlist ang biktima ngunit inaalam pa kung may kaugnayan sa iligal na droga ang insidente.

Nagtamo ng bala sa iba’t ibang bahagi ng katawan si Junio na kayang ikinasawi.

Narekober sa crime scene ang 22 basyo ng bala.