Ayon sa Department of Health – Eastern Visayas, mula Enero hanggang Pebrero ay pumalo na sa 1,169 na ang kaso ng dengue sa rehiyon.
Doble ito sa bilang na naitala sa kaparehong panahon na mayroon lamang 561 kaso.
Ayon kay DOH – Eastern Visayas regional director Dr. Minerva Molon, posibleng ang pagpapabaya sa paglilinis sa kapaligiran ang dahilan ng pagdami ng kaso ng sakit.
Paliwanag ni Molon kung ang isang baranggay ay may kaso ng dengue at maglilinis, ang susunod na baranggay naman na hindi pa naglilinis ang lilipatan ng mga lamok na may dalang sakit.
Hinimok ng kagawaran ang publiko na panatilihin ang kalinisan lalo na sa mga lugar ng bahay na maaaring pamugaran ng lamok.