Isang 16 anyos na lalaki na binisita ang kaibigang nakakulong sa San Nicolas Police Precinct detention cell ang naaktuhang nag-aabot sa preso ng pitaka na may lamang hinihinalang shabu.
Ayon kay SPO2 Edgardo Erci Emia, San Nicolas Precinct desk officer, inaresto ang binatilyo matapos madiskubre na ang pitaka ay may lamang 8 pakete ng hinihinalang shabu.
Binisita ng binatilyo ang kaibigang si Jun Ramas na nakakulong dahil sa kasong possession of illegal drugs.
Habang nag-uusap ang dalawa, dumaan si PO1 Floro Lada na nakitang iniaabot ng bata ang pitaka kay Ramas.
Nagulat ang pulis nang makita sa pitaka ang 8 pakete ng umanoy shabu.
Itinurn-over na ang hindi pinangalanang suspek sa Operation Second Chance, isang pasilidad para sa mga kabataang lumabag sa batas.