Inaresto ang isang matandang lalaki matapos nitong pagbabarilin ang kanyang kapitbahay sa Barangay Barangka, Marikina City araw ng Sabado.
Nakilala ang suspek na si Alfonso Cabasag, 73 anyos, isang retiradong empleyado ng Social Security System (SSS).
Lumabas sa imbestigasyon na mayroon nang dating alitan ang suspek at ang biktimang nakilalang si Romeo Caligagan, 61 anyos.
Nagkaroon muli ng sagutan at hindi pagkakaunawaan ang dalawa.
Pumasok sa kanyang bahay ang suspek at lumabas na may dala ng baril saka pinaputukan ng dalawang beses ang biktima.
Agad na isinugod sa Amang Rodriguez Medical Center si Caligagan na patuloy na inoobserbahan ng mga doktor.
Si Cabasag naman ay inaresto ng mga pulis at nakuha mula sa kanya ang isang 9mm caliber na baril at dalawang magazines na naglalaman ng 15 bala.
Nakakulong ngayon ang suspek at nahaharap sa mga kasong frustrated murder, paglabag sa RA 10591 o Illegal Possession of firearm and Ammunition at illegal discharge of firearm kaugnay ng Omnibus Election Code.