Sangkatutak na kaso ang isinampa ng Philippine Health Insurance Corporation (Philhealth) laban sa isang neurologist sa South Cotabato dahil sa paniningil ng bogus medical bills gamit ang account ng ilang Philhealth members.
Sinabi ni Philhealth vice president for corporate affairs Shirley Domingo na iniimbestigahan na rin nila kung posibleng may kasangkot sa kanilang tanggapan ang nasabing duktor.
Umaabot sa 21 kaso ng misrepresentation and breach of warranties of accreditation and performance commitment ang isinampa ng Philhealth laban kay Dr. Dennis Menguita.
Naniniwala ang opisyal na may mga kasangkot pa na ilang Philhealth officials sa nasabing anumalya kaugnay sa pamemeke ng ilang dokumento ng ahensya.
Kung nangyari ito sa nasabing lugar, sinabi ni Domingo na pwede rin itong gawin ng iba pang mga duktor kaya sisilipin nila ng husto ang kanilang mga records.
Nauna nang lumutang ang pangalan ni Dr. Menguita sa isinagawang deliberasyon ng Senado sa budget ng Department of Health.