Palasyo, handang makipag-dayalogo sa Simbahang Katolika

Bukas pa rin ang Palasyo ng Malakanyang na makipag-dayalogo sa mga kagawad ng Simbahang Katolika.

Ito ay para maayos na ang palitan ng maaanghang na salita sa pagitan ni Pangulong Rodrigo Duterte at ng mga obispo.

Ayon kay Presidential spokesman Salvador Panelo, pag-depensa lamang sa sarili ang ginawa ng pangulo nang banatan ang mga obispo.

Matatandaang noong Hunyo ng nakaraang taon, bumuo ang pangulo ng komite na naatasang makipag-dayalogo sa mga kagawad ng Simbahang Katolika pero wala namang nangyari.

Ayon kay Panelo, hindi kasi dapat na gamitin ng mga obispo ang pulpito para banatan ang pangulo.

Kung ginagamit aniya ng mga obispo ang pulpito ay gagamitin din ng pangulo ang kanyang tanggapan para buweltahan ang mga bumabatikos sa kanya.