Mga Pinoy hindi nadamay sa pagsabog sa Paris – DFA

Walang Filipino na nadamay sa pagsabog sa isang bakery sa Paris, France nitong Sabado ayon sa Department of Foreign Affairs (DFA).

Ayon sa pahayag na inilabas ng DFA araw ng Linggo, sinabi ng French Ministry of Foreign Affairs na walang Filipino na kabilang sa tatlong nasawi o maging sa halos 50 nasugatan dahil sa pagsabog.

Isang gas leak ang itinuturong dahilan ng naturang pagsabog na nagresulta sa pagkabasag ng mga bintana at maging pagbaliktad ng mga kotse.

Samantala, nagpahayag ng pakikiramay ang Philippine Embassy sa Paris para sa mga pamilya ng mga biktima.

Nasa 25,000 Filipino ang kasalukuyang nasa France kung saan karamihan ay naninirahan sa Paris ayon sa DFA.