Ibinasura ng Department of Justice ang dalawang reklamo na inihain laban sa pamunuan ng Iglesia ni Cristo (INC) dahil sa kawalan ng sapat na batayan at ebidensya.
Sa dalawang magkahiwalay na resolusyon, inirekomenda ng DOJ panel na idismiss ang mga reklamo na inihain nina Isaias Samson at Lito Fruto laban sa Sanggunian ng Iglesia ni Cristo.
Ayon sa DOJ, nabigo ang kampo ni Samson na patunayan ang paratang nitong grave coercion at illegal detention. Wala rin anilang ebidensya na nakaranas ang mga ito ng pisikal na pananakit, pagbabanta, karahasan at intimidation mula sa Sanggunian ng Iglesia ni Cristo nang kumpiskahin ang kanyang pasaporte, service vehicle, laptop, cellphone at iba pang personal na gamit at nang umano’y pwersahing pasukin ang kanyang tahanan.
Bukod sa kaso ni Samson, wala ring probable cause ang reklamo ni Fruto laban sa INC na illegal arrest, arbitrary detention at violation of abode.
Ibinasura rin ang reklamo nitong robbery dahil sa wala naman siya sa bahay nang maganap ang di umanoy pagnanakaw.
Ang mga resolusyon ay nilagdaan at inaprubahan ni Prosecutor General Claro Arellano.
Ang panel na nag-imbestiga ay pinamunuan ni Senior Deputy State Prosecutor Theodore Villanueva at miyembro naman sina Asst. State Prosecutors Olivia Torevillas and Mark Roland Estepa.