Napatay ng mga pulis ang dalawang lalaking miyembro umano ng Basag Kotse gang sa Barangay Greater Lagro, Quezon City.
Ayon sa hepe ng Quezon City Police District (QCPD) na si Police Chief Superintendent Joselito Esquivel, unang nakatanggap ng reklamo ang QCPD Station 5 tungkol sa insidente ng pagnanakaw.
Kwento ng biktima na isang barangay official, binasag ng dalawang kawatan ang salamin ng kanyang sasakyan at kinuha ng mga ito ang kanyang tablet at laptop.
Agad na nagkasa ng follow-up operation ang mga otoridad upang mahuli ang dalawa.
Samantala, nagsasagawa naman ng isang buy bust operation ang isa pang team ng mga pulis sa lugar, at nang makita ng dalawang lalaki ang mga ito ay una silang nagpaputok ng kanilang mga baril.
Gumanti ng putok ang mga pulis na nagresulta sa agarang pagkamatay ng hindi pa nakikilalang mga suspek.
Narekober mula sa mga ito ang dalawang kalibre .38 revolver na kargado ng mga bala at ilang mga gamit na pinaniniwalaang ninakaw ng mga ito.