Sa kasalukuyang ay nanatiling tahimik ang pagdiriwang ng Pasko ayon sa monitoring ng Philippine National Police (PNP).
Sa kanyang ulat ngayong hapon, sinabi ni PNP Chief Oscar Albayalde na tatlong insidente lamang ang kanilang naitala sa kasalukuyan.
Kinabibilangan ito ng pamamaril ng isang pulis sa Caloocan City na ikinasugat ng ilan katao, kaso ng indiscriminate firing sa lalawigan ng Pangasinan at barilan sa pagitan ng New People’s Army members at tropa ng pamahalaan sa Davao Del Sur.
Umaasa ang pinuno ng PNP na magiging mapayapa sa susunod na mga oras ang buong bansa.
Kaugnay nito ay mananatiling nasa heightened alert status ang buong pwersa ng PNP at militar hanggang sa pagsalubong ng 2019.
Bukas ay nakatakdang ipagdiwang ng Communist Party of the Philippines ang kanilang ika-50 taong anibersaryo at inaasahan ng pamahalaan na sasabayan ito ng mga pag-atake lalo na sa mga lalawigan.
Iyun din ang dahilan kaya hindi tinapatan ng gobyerno ng ceasefire ang tigil-putukan na ipinatupad ng rebeldeng grupo.