P36M na halaga ng shabu nasamsam sa Cebu

Tinatayang nasa P36 milyon halaga ng high grade shabu ang nasamsam sa isang buy bust operation sa Barangay Sambag 2, Cebu City Biyernes ng gabi.

Naaresto sa operasyon ang isang Alyas Michael at tatlo nitong kasamahan makaraang magpanggap na bibili ng droga ang isang poseur buyer.

Bukod sa P12,000 na halaga ng shabu, nakuha rin sa bahay ni alyas Michael ang nasa tatlong kilo ng hinihinalang shabu.

Ayon kay Senior Supt. Royina Garma, director ng Cebu City Police Office, pawang mga high grade ang nakuha nilang droga at galing umano ng Maynila.

Iniimbestigahan na ng pulisya kung paano ipinapasok sa Cebu ang nasabing mga droga.

Sasampahan naman ang mga suspek ng paglabag sa Republic Act 9165 o Comprehensive Dangerous Drugs Act of 2002.