Magbubukas na muli ngayong araw ang sesyon sa Kongreso makalipas ang isang buwang Halloween break.
Kabilang sa mga nakatakdang talakayin sa Mababang Kapulungan ang pag-amyenda sa P3.7 trillion 2019 national budget, muling pagbubukas sa imbestigasyon tungkol sa kontrobersyal na Dengvaxia vaccine, maging ang consolidated impeachment complaints laban sa ilang mga mahistrado ng Korte Suprema.
Kabilan dito sina Supreme Court Justices Diosdado Peralta, Lucas Bersamin, Francis Jardeleza, Noel Tijam, Andres Reyes, Jr., at Alexander Gesmundo.
Samantala, para naman sa Senado, tatalakayin ang nasa 74 mga panukalang batas na aprubado na para sa ikatlo at huling pagbasa.
Habang mayroong 90 naman na hinihintay na lamang ang lagda ni Pangulong Rodrigo Duterte.
Batay sa legislative calendar, makalipas ang mahigit isang buwan ay muling magsasara ang sesyon sa Kongreso sa December 15 para sa Christmas break.
Muling babalik sa sesyon ang dalawang kapulungan sa January 13, ngunit pagdating ng Pebrero ay muling magkakaroon ng break upang magbigay daan sa election season.