P1 rollback sa oil products, ipatutupad simula ngayong araw

Sa ikaapat na sunod na linggo ay mayroong rollback sa presyo ng mga produktong petrolyo.

Ito ay dahil pa rin sa pagbaba ng presyo ng petrolyo sa pandaigdigang merkado.

Piso ang bawas sa kada litro ng diesel habang P1.10 naman sa kada litro ng gasolina.

Buena mano na magpapatupad ng bawas presyo ang Phoenix Petroleum Philippines na epektibo na ang rollback alas-6:00 ng umaga ngayong araw ng Linggo.
Sa advisory ng naturang kumpanya, maaga silang nagpatupad ng bawas-presyo para masulit naman ng mga motorista ang long weekend.

Samantala, nag-anunsyo na rin ang Petro Gazz at Eastern Petroleum na ang kanilang rollback ay epektibo bukas, Lunes, alas-6:00 ng umaga.