Sa pamahalaan at militar isinisi ni Bayan Muna chairman at dating Representative Neri Colmenares ang pamamaslang sa siyam na mga magsasaka sa Sagay City Negros Occidental.
Sa isang pahayag, sinabi ni Colmenares na ang pinagsasakahang lupa ng mga biktima ay isang land cultivation area (LCA) na naunang inakusa ng militar bilang communal farm ng New People’s Army (NPA).
Ngunit ani Colmenares, hindi ito totoo sapagkat ang usapin tungkol sa mga lupain ay tunay na nangyayari sa mga kanayunan. Aniya, pamamaraan lamang ito ng administrasyon upang tuldukan ang anumang protesta sa pamamagitan ng pag-criminalize sa mga hiling ng magsasaka.
Ayon pa sa dating mababatas, maging ang secretary general ng Unyon ng Manggagawa sa Agrikultura at Negros Federation of Sugar Workers (NFSW) na si John Milton “Butch” Lozande ay sinisisi ang pamahalaan sa pagkamatay ng kaniyang mga miyembro.
Hiling ni Colmenares na magkaroon ng impartial na pagsisiyasat tungkol sa masaker. Aniya, hindi sila titigil hangga’t walang natatamasang hustisya para sa siyam na mga magsasaka.
Samantala, mariin ding kinundena ng grupong Karapatan ang pamamaslang.
Sa hiwalay na pahayag, sinabi ng grupo na nais nilang magsagawa ng sariling imbestigasyon tungkol dito Commission on Human Rights (CHR).