Bugbog-sarado ang isang snatcher matapos kuyugin ng mga tao dahil sa kanyang pagnanakaw sa kahabaan ng A. Mabini Street, malapit sa C-3 na sakop ng Barangay 23, Caloocan City.
Nakilala ang arestadong suspek na si Christopher Villacorta, 43 taong gulang.
Kwento ng babaeng biktima ni Villacorta, nakasakay siya sa isang pampasaherong jeep nang biglang dukutin ng suspek ang kanyang mamahaling cellphone. Aniya, nagpanggap bilang kapwa pasahero ang suspek.
Matapos ang pagnanakaw ay agad bumaba ng jeepney si Villacorta upang tumakas.
Sumigaw at humingi ng tulong mula sa mga tao sa kalsada ang biktima. Sila ang humabol sa suspek at nang ma-corner ay binugbog ito.
Eksakto namang nagpapatrolya ang mga otoridad sa lugar at doon na naaresto si Villacorta.
Narekober mula sa suspek ang cellphone ng biktima, na desididong sampahan ito ng kasong robbery snatching.