Nasunog ang isang residential area sa bahagi ng Barangay 8, Dagat-dagatan, Caloocan City.
Ayon kay Special Fire Office 1 Ferdinand Santos ng Caloocan City Fire Department, sumiklab ang sunog pasado ala-1 ng madaling araw.
Agad na itinaas sa ikatlong alarma ang sunog dahil sa mabilis na pagkalat ng apoy dahil gawa sa mga light materials ang mga kabahayan sa lugar, lalo na’t informal settlers ang nakatira dito.
Bagaman iniimbestigahan pa ang tunay na sanhi ng pagliliyab, hinala ng mga residente na sumiklab ang sunog dahil sa naiwang nakasinding kandila sa loob ng isang abandunadong bahay.
Anila, madalas kasi itong ginagawang sugalan ng mga kabataan sa lugar. Wala rin umanong kuryente ang naturang bahay.
Tinatayang nasa 30 kabahayan ang tinupok ng apoy, kung saan nasa P200,000 ang kabuuang pinsalang dulot nito.
Sa ngayon ay pansamantalang manunuluyan sa barangay covered court ang mga apektadong residente.