Special courts para sa Dengvaxia cases hiniling ng PAO sa SC

Hiniling ng Public Attorney’s Office (PAO) sa Korte Suprema ang pagbuo ng special courts na silang didinig sa mga kasong sibil at kriminal na mayroong kaugnayan sa kontrobersyal na Dengvaxia vaccine.

Sa apat na pahinang liham na may petsang May 8, 2018 at naka-address kay dating Acting Chief Justice Antonio Carpio at Court Administrator Jose Midas Marquez, sinabi ng PAO na layunin ng pagbuo ng special courts ang makaiwas sa magkakaibang desisyon kung didinggin ang mga kaso sa iba’t ibang mga regional trial court (RTC).

Partikular na hiniling ng PAO, sa pangunguna ni Deputy Chief Public Attorney Ana Lisa Soriano, ang pagkakaroon ng special court sa Manila RTC at sa Quezon City RTC.

Ayon sa PAO, anim na kasong kriminal, kabilang ang reckless imprudence resulting in homicide and torture, at apat na kasong sibil ang naisampa na sa QC RTC.

Samantala, 17 kasong kriminal naman ang isinampa ng PAO sa Department of Justice (DOJ) laban sa kina Health Secretary Francisco Duque, dating Health Secretary Janette Garin, Sanofi Pasteur, Zuellig Pharma, at iba pang mga opisyal ng Department of Health (DOH).