Sara Duterte, mananatiling Davao mayor kung muling iboboto ng mga Dabawenyo

Inihayag ni Davao City Mayor Sara Duterte-Carpio na mananatili siyang alkalde kung muling iboboto ng mga Dabawenyo.

Ito ay matapos makapasok ang Presidential daughter sa top 12 ng 2018 Pulse Asia pre-election survey para sa senatorial race.

Si Sara ay nasa ikalimang pwesto ng listahan ng mga personalidad na posibleng manalo sa May 2019 elections.

Ayon kay Sara, ikinalulugod nito ang tiwala sa kaniyang kakayahan.

Interesado siguro aniya ang mga Pilipino sa kaniyang trabaho sa lungsod mula pa noong 2010.

Ngunit kung iboboto aniya siyang muli ng mga Dabawenyo, ipagpapatuloy niya ang pagiging alkalde sa lungsod.

Noong nakaraang buwan, sinabi ni Pangulong Rodrigo Duterte na hindi naghahangad ng national post si Sara.