LOOK: Eroplano ng Cathay Pacific ibinalik sa gawaan dahil sa maling spelling

Inilabas ng Cathay Pacific sa kanilang Twitter account ang larawan ng kanilang eroplano na mali ang spelling ng pagkakasulat ng pangalan ng airline.

Sa halip na Cathay Pacific ay “CATHAY PACIIC” ang nakasulat sa Boeing 777-367.

Ang larawan ng eroplano ay kinuhanan habang ito ay nasa Hong Kong International Airport.

Unang lumabas ang larawan sa Facebook group ng Hong Kong Aviation Discussion Board.

Sa halip na itago o ilihim ang pagkakamali ay ipinost pa ng Cathay ang larawan ng eroplano sa kanilang sariling Twitter account.

Sinabi rin ng Cathay na ibabalik sa shop ang eroplano para maiayos ang pagkakamali.