Nakatakdang talakayin ng Korte Suprema ang petisyon ni Sen. Antonio Trillanes IV laban sa pagpapawalang-bisa ni Pangulong Rodrigo Duterte sa kanyang amnestiya sa Martes.
Ayon sa sources, tatalakayin ang petisyon ni Trillanes sa regular en banc session ng Supreme Court bukas.
Sa ngayon ay wala umanong rekomendasyon mula kay Associate Justice Diosdado Peralta, kung kanino na-raffle ang petisyon ni Trillanes, ukol sa paglalabas ng temporary restraining order (TRO) o writ of preliminary injunction (WPI) na pipigil sa Proclamation No. 572 ni Duterte habang nakabinbin ang kaso.
Sakali namang may rekomendasyon na TRO mula kay Peralta, pagbobotohan ito ng en banc.
Worst case scenario naman sa senador ang agarang pagbasura ng Korte Suprema sa kanyang petisyon sa gitna ng kaso laban sa kanya sa dalawang branch ng Makati Regional Trial Court (RTC).