700 gramo ng shabu nasabat sa 2 suspek sa Maynila

Timbog ang isang lalaki at isang babae matapos maaresto sa ikinasang drug buy bust operation ng mga pulis sa Malate, Maynila.

Ayon kay Manila Police District (MPD) Station 5 commander Superintendent Igmedio Bernaldez, sa ngayon ay hindi muna nila ilalabas ang pangalan ng mga naarestong suspek habang patuloy ang kanilang imbestigasyon.

Ani Bernaldez, inaalam pa ng kanilang hanay ang pagkakakilanlan ng miyembro ng sindikatong kinabibilangan ng dalawa, maging ang kanilang source ng ipinagbabawal na gamot.

Narekober mula sa dalawa ang 700 gramo ng shabu na nakasilid sa walong transparent plastic bag.

Mahaharap ang dalawang drug pusher sa kasong paglabag sa Republic Act 9165 o Comprehensive Dangerous Drugs Act of 2002.