Sa 11pm heavy rainfall warning ng PAGASA, nakataas ang red warning level sa lalawigan ng Rizal.
Sa ilalim ng lebel na ito ay mararanasan ang torrential rains sa susunod na tatlong oras at lubhang mapanganib ang pagbaha at kailangan ang kaukulang aksyon tulad ng paglikas.
Nakataas naman ang orange warning level sa Metro Manila, Cavite, Batangas, Bataan, Zambales, Pampanga at Bulacan kung saan mapanganib din ang pabaha.
Sa Laguna at Northern Quezon naman ay nakataas ang yellow warning level na posible ang pagbaha sa mga mabababang lugar.
Makararanas naman ng mahihina hanggang sa katamtaman na paminsan-minsan ay may malalakas na pag-uulan sa Nueva Ecija, Tarlac at nalalabing bahagi ng Quezon na posible ring tumagal ng tatlong oras.
Samantala, sa panayam ng Radyo INQUIRER kay PAGASA weather specialist Meno Mendoza, posibleng tumagal pa hanggang August 15, Miyerkules, ang mga pag-uulang nararanasan sa bansa.
Ang publiko ay pinapayuhang manatiling nakatutok sa PAGASA at sa Disaster Risk Reduction and Management Offices para sa lagay ng panahon.
Ilalabas ang next advisory ng PAGASA alas-2 bukas ng madaling araw.