2 babaeng tulak ng droga, huli sa Maynila; P6.5 million ng shabu, nakumpiska

 

Tinatayang P6.5 million na halaga ng shabu ang nasabat ng mga awtoridad mula sa dalawang babaeng tulak ng droga sa ikinasang buy-bust operation sa New Antipolo St., Tondo, Maynila.

Kinilala ang mga suspek na sina Girlie Lopez at Leah Carpio, kapwa residente sa nabanggit na lugar.

Ayon kay National Capital Region Police Office o NCRPO Chief Guillermo Eleazar, matagumpay na nakabili ng P5,000 na halaga ng shabu mula sa dalawang suspek ang isang operatiba na nagpanggap na buyer.

At nang magkaabutan na ng pera at droga, mabilis na dinamba at pinosasan sina Lopez at Carpio.

Nakumpiska sa operasyon ang labing-siyam na sachet ng droga na tumitimbang ng halos isang kilo, kasama na rito ang buy-bust money.

Sasampahan ang mga suspek ng kasong paglabag sa Dangerous Drugs Act.