Labis na nabahala si Pangulong Rodrigo Duterte sa naganap na car bombing kahapon sa Lamitan City, Basilan kung saan humigit kumulang sa sampu katao ang nasawi.
Ayon kay Special Assistant to the President Christopher “Bong” Go, personal na kinausap ng pangulo sina National Security Adviser Hermogenes Esperon at Interior and Local Government officer in charge Eduardo Año.
Nais ng pangulo na alamin kung anong grupo ang nasa likod ng pagsabog at kung ano ang kanilang motibo.
Ayon kay Go, wala naman dapat ideklara ang pangulo kaugnay sa nangyari dahil umiiral pa ang Martial Law sa buong Mindanao hanggang sa katapusan ng taon.
Balak din aniya ng pangulo na bisitahin ang mga nasawi sa pagsabog pero dahil sa mga Muslim ang mga ito ay kaagad silang nailibing.
Tiniyak naman ng Malacañang na mabibigyan ng tulong ang mga kaanak ng mga namatay sa pagsabog.