Pinag-iingat ng Bureau of Animal Industry o BAI ang publiko laban sa kumakalat na “fake news” partikular ang balitang nagsasabi na huwag daw kumain ng karne ng baboy dahil sa sakit at tadtad umano ng antibiotic.
Sa isang statement, mariing pinabulaanan ito ng BAI.
Wala rin katotohanan, ayon sa ahensya, ang balitang mayroong apatnapung baboy na namamatay kada araw dahil sa influenza.
Paglilinaw ng BAI, hindi sila naglalabas ng ganoong report sa social media.
Dagdag nito, ang Department of Agriculture ay may mga ahensya at laboratory, at nakikipagtulungan sa mga nag-aalaga ng baboy upang mapanatiling sapat at ligtas ang suplay ng karne.
Apela naman ng BAI sa publiko lalo na sa netizens, huwag agad maniwala sa mga balita na kumakalat sa social networking sites at text messages, at sa halip ay suportahan ang industriya ng paghahayupan sa pamamagitan ng pagtangkilik sa mga lokal na produkto.