Arestado na sa Barangay Burgos, Rodriguez, Rizal matapos ang halos dalawang taong pagtatago sa batas ang No. 1 Most Wanted person ng Marikina City.
Nakilala ang suspek na si Nazarene Adornado alyas Nazi, 32 taong gulang na mayroong pending warrant of arrest para sa kasong pagpatay sa isang Arthur Andres sa Barangay Malanday, Marikina City noong November 20, 2016.
Ayon sa mga operatiba ng Marikina City Police, nakatanggap sila ng impormasyon mula sa isang sibilyan na sa Barangay Burgos naninirahan si Adornado.
Kaya naman agad na nagkasa ng surveillance ang mga otoridad sa pakikipagtulungan sa Rodriguez Municipal Police upang maberipika ang naturang impormasyon.
Nang mamataan si Adornado ay lumapit ang mga pulis at ihinain ang kanyang warrant of arrest na inisyu ni Judge Acerey Pacheco ng Marikina City Regional Trial Court (RTC) Branch 165.
Sa ngayon ay nakapiit na ang suspek sa himpilan ng Marikina City Police upang harapin ang kanyang sintensya.