Halos dalawang oras na naglakad sa ilalim ng init ng araw ang isang pamilya ng katutubong dumagat patungo sa kabayanan ng Casiguran sa lalawigan ng Aurora upang humanap ng makakain.
Si Imelda Banayad, kasama ang kaniyang sanggol pang anak ay nagdesisyong bumaba na lamang mula sa kanilang tirahan sa bundok dahil wala na umano silang makuhanan ng pagkain.
Ayon kay Banayad, winasak ng bagyong Lando ang kanilang bahay at halos wala silang naisalba sa kanilang mga gamit.
Maging ang mga damit at gamit sa pagluluto ay hindi umano nila naisalba. “Nasa bundok po kami noon, ang mga bata basing-basa, magdamag kasi umulan, ang bahay naming nasira. Nung tumugil po ang ulan, wala na kaming makain kasi wala nang natira sa amin, pati mga tanim naming nasira,” ayon kay Banayad.
Nagpasya si Banayad na bumaba sa bayan, kasama ang wala pang isang taong gulang na anak at magbabaka-sakaling may mahingan ng tulong.
Ang mga bata aniya sa kanilang lugar sa Barangay Dibacong ay nagugutom na at halos isang beses sa isang araw lamang kung kumain.
Isa ang nasabing barangay sa Casiguran sa labis na naapektuhan ng bagyong Lando.