Humihirit si Special Assistant to the President (SAP) Bong Go sa kanyang mga taga-suporta na tanggalin na ang mga posters at tarpaulin na naghihikayat sa kanya upang tumakbo para sa Senado sa susunod na taon.
Ayon kay Go, hindi siya interesado at hindi niya kailangang tumakbo gayung may trabaho naman siya na kanyang pinagkaka-abalahan at ito ay ang tumulong sa kapwa.
Panawagan ni Go sa kanyang mga taga-suporta, gamitin na lamang ang kanilang resources para sa mga nangangailangan sa halip na gugulin ito sa billboard at tarpaulin bilang bahagi ng panliligaw sa kanya upang lusungin ang pagkandidato.
Kaysa aniya gastusin ng kanyang mga taga-sunod ang kanilang pera sa mga signages, ipambili na lang ito ng plywood upang matulungan ang mga naging biktima ng sunog para may maitayong tahanan.
Paglilinaw pa ni Go, wala siyang kinalaman sa mga billboard at posters na nananawagan sa kanyang mag-senador.