4 sa 10 nasawi na mayor lang ang may kaugnayan sa droga – DILG

Nilinaw ng Department of the Interior and Local Government (DILG) na apat lang sa sampung napapatay na mayor sa ilalim ng administrasyong-Duterte ang inuugnay sa droga.

Sinabi ni Interior Usec. Martin Diño na tanging sina Albuera, Leyte Mayor Rolando Espinosa Sr., Tanuan City Mayor Antonio Halili, Datu Saudi Ampatuan, Mayor Samsudin Dimaukom at Ozamiz Mayor Reynaldo Parojinog ang diumano’y may kinalaman sa bentahan ng droga.

Ang anim pang pinatay ay sina Pantar Mayor Mohammad Exchan Limbona, Marcos Mayor Arsenio Agustin, Bien Unido Mayor Gisela Bendong-Boniel, Balete Mayor Leovino Hidalgo, Buenavista Mayor Ronald Lowell Tirol at Gen. Tinio Mayor Ferdinand Bote.

Dagdag pa ng opisyal sa drug watchlist na hawak ng Philippine Drug Enforcement Agency (PDEA) may mahigit 100 mayor at higit 200 punong barangay ang nakalista.