Hindi na naaangkop ang taguri ni Pangulong Rodrigo Duterte na ‘cesspool’ sa isla ng Boracay ayon kay Department of Environment and Natural Resources (DENR) Secretary Roy Cimatu.
Ito ay matapos ang malawakan at maigting na rehabilitasyong isinasagawa ng gobyerno ngayon sa isla.
Sa panayam ng mga mamamahayag sa selebrasyon ng ika-31 anibersaryo ng kagawaran, sinabi ni Cimatu na ‘slowly recovering’ na ang Boracay at hindi na ito ‘cesspool’.
Tinitiyak niya anya ito at iginiit pa na malinis ang White Beach ng isla.
Samantala, sinabi pa ng opisyal na tuloy ang pagbubukas ng Boracay sa October 26 at hinihintay na lamang na matapos ang mga kalsadang ginagawa para ma-decongest ang lugar.
Isinasagawa rin anya ang araw-araw at lingguhang monitoring sa lagay ng tubig sa isla.
Ang isla ng Boracay ay isinailalim sa state of calamity sa loob ng anim na buwan mula noong April 26 dahil sa kinahaharap na problemang pangkalikasan partikular ang problema sa sewerage system.