Tatlong isyu ang pinag-aaralan ngayon ng Special Investigation Task Group FB Bote sa ambush kay General Tinio Nueva Ecija Mayor Ferdinand Bote.
Ayon kay Police Regional Office 3 Director, Chief Supt. Amador Corpuz ito ang nakikita nilang posibleng dahilan ng pamamaslang kay Mayor Bote.
Gayunman, tumanggi si Corpuz na idetalye ito.
Nilinis naman ng opisyal ang posibilidad na isyu ng droga sa pagpatay dito sapagkat ayon dito hindi naman kasama sa narco-list ni Pangulong Durterte si Mayor Bote.
Masyado pa naman anyang maaga upang sabihin kung ano ang motibo sa krimen pero lahat anya ng anggulo ay kanila nang pinag-aaralan.
Nakausap na rin anya nila ang security ng alkalde at sinabing walang banta sa buhay nito.
Sa katunayan nga anya ay sanay itong lumakad na walang body guard.
Mayroon ayon kay Corpuz na dalawang police security details ang alkalde pero hindi niya ito isinasama sa mga lakad kaya ilang araw na ang nakalipas nang paalalahanan nila si Mayor Bote na isama ang kanyang mga police escorts.