Pahayag na human rights calamity ang Duterte leadership inalmahan ng Malakanyang

Kalokohan ang pahayag ng New York-based Human Rights Watch na nauwi na sa human rights calamity ang dalawang taong pamumuno ni Pangulong Rodrigo Duterte.

Paliwanag ni Presidential Spokesman Harry Roque, maaring nakakalimutan ng taong bayan na mayroong iba’t ibang klase ang karapatang pantao.

Katwiran ni Roque na isinusulong ng pangulo ang karapatang pantao sa Pilipinas.

Halimbawa na lamang aniya ang libreng tuition sa mga State Universities at Colleges (SUCs), libreng pagkain sa mga eskwelahan, libreng patubig sa mga sakahan, at iba pa.

Sinabi pa ni Roque na wala nang mas importante pa sa pangulo kundi ang itaguyod ang karapapatang pantao.

Pursigido aniya ang pangulo na itaguyod ang kampanya kontra sa ilegal na droga pati na ang pagtataguyod sa kalusugan at karapang mabuhay ng bawat Filipino.