Pinagbabaril ng hindi pa nakikilalang salarin ang isang aktibong pulis sa labas ng NAPOLCOM Building sa Jupiter Street, Makati City.
Kinilala ang nasawing pulis na si PO2 Teejay Valdez na isang aktibong pulis-Marikina.
Batay sa paunang imbestigasyon ng mga otoridad, dumalo sa pagdinig si Valdez sa National Police Commission (NAPOLCOM) kaugnay ng kasong administratibo laban sa kanya.
Mayroon kasing tatlong bilang ng grave misconduct na nakasampa kay Valdez noong 2016 nang siya ay naka-assign sa Eastwood Police Station.
Papasakay na ito sa kanyang kotse nang pagbabarilin ng isang lalaki na nakasuot ng itim na jacket at sumbrero.
Tatlong beses na malapitang pinaputukan sa ulo mula sa likod si Valdez na nagresulta sa kanyang agarang pagkamatay.
Patuloy ang imbestigasyon ng mga otoridad tungkol sa insidente. Sa kasalukuyan ay nangangalap sila ng CCTV footage sa lugar at mga nakasaksi upang makilala ang salarin.