Drug suspek nasawi sa engkwentro sa loob ng Manila North Cemetery

Nauwi sa engkwentro ang ikinasang buy bust operation ng mga elemento ng Manila Police District (MPD) Station 3 sa loob ng Manila North Cemetery sa Sta. Cruz, Maynila.

Nasawi ang drug suspek na kinilalang si Alexander Dimalanta alyas Jojo na residente ng Sta. Cruz.

Ayon sa mga otoridad, sa kalagitnaan ng operasyon ay natunugan ni Dimalanta na pulis pala ang kanyang katransaksyon, dahilan upang bumunot ito ng baril at paputukan ang mga ito.

Nagtamo ng mga tama ng bala sa katawan ang suspek na kaagad namang isinugod sa Chinese General Hospital ngunit idineklarang dead on arrival ng mga doktor.

Narekober mula sa pinangyarihan ng insidente ang isang kalibre 38 revolver at P3,000 halaga ng shabu.